SmarTone: 古治唔係得個估字

古治係雲高爾秘密棋子?

專欄刊登於 "SmarTone足球機" App，感謝客戶邀請撰寫。

20140705 - 8強：荷蘭 Vs 哥斯達黎加，賽日專欄

古治唔係得個估字

文：何栢霖

上一圈，荷蘭受福塔雷薩嘅酷熱天氣影響下，幾乎完全受制於墨西哥腳下，加上中場鐵漢尼祖迪莊9分鐘已傷出，逼使教練雲高爾臨場一再變陣：中堅馬田斯恩迪後備入替任左閘，左閘戴利布連特就調任防守中場；到下半場早早先失，雲高爾亦當機立斷，拉後古治客串右閘，並換入新星迪派爾加強左路側擊。

古治向來實而不華，每次上陣例必同你跑到最後，有佢喺邊線同對方翼衛球員鬥力，守，則可消耗對方體力；攻，亦可放生洛賓入中路。果然，末段反撲期間，洛賓的確多番喺禁區內活動，補時最後一刻搏到絕殺12碼，更係荷蘭對付蒸籠球場嘅最佳回報。當然，洛賓有冇插水誇大動作，係好值得商榷…

嚟到8強，荷蘭連續兩圈都遇上中北美洲對手，墨西哥同哥斯達黎加都同樣起用五人防線。估計古治係今場嘅關鍵先生，加上哥軍防守高波一般，上一場不斷被希臘嘅角球轟炸造成埋門。雲佩斯或後備亨迪拿等人，今場隨時鐵頭得手。

呢場喺薩爾瓦多踢嘅5點波，天氣報告估計有雷雨。加上哥斯達黎加好韌，預計荷蘭淨勝一球，90分鐘內昂首入4強。

SmarTone: 蒸籠下的雲外看

可能係今屆世界盃，其中一張最震撼相片... (網上圖片)

專欄刊登於 "SmarTone足球機" App，感謝客戶邀請撰寫。

20140629 - 16強：荷蘭 Vs 墨西哥，賽日專欄

蒸籠下的雲外看

文：何栢霖

今晚欣賞荷蘭大戰墨西哥，大概都係抱住「雲外看，花生脆」嘅心態：第一嚿雲，當然係雲佩斯復出；但第二嚿雲就更加重要：天氣。喺B組全勝晉級嘅荷蘭，頭三場都只係喺氣候溫和嘅城市比賽，南下阿雷格里港擊敗澳洲3:2一役，當地下晝1點開波，氣溫只有攝氏14度，涼夾爽。但今日橙軍就首度北上，要喺今屆世界盃「四大蒸籠城市」之一嘅福塔雷薩比賽，同樣踢當地下晝1點場，但預計氣溫高達攝氏30度，仲要陽光猛烈，濕夾熱。加上橙軍尼祖迪莊、洛賓等三線脊骨，近日都因輕微撞傷而冇跟大隊操練，歐洲人，點算？要知道，日前強如德國，喺呢度嘅攻守速率，都俾加納比下去。

相反，墨西哥喺A組，四大蒸籠城市佢哋踢勻三個，開波氣溫亦介乎攝氏26-28度，但唔單止不敗出線，仲只失一球。0:0逼和巴西一役，都係喺福塔雷薩踢，的確對於今場甚有參考價值。嗰場主守嘅墨西哥，固然打起門將吳鎮宇… 呀，係奧曹亞先真，但三大中場硬漢亦功不可抹：古亞達度逼搶、落底出波，靴里拉同華斯基斯左右遠射開弓。雖然今場有華斯基斯停賽，但相信墨西哥已做好準備，同荷蘭打一場轟轟烈烈嘅體力消耗戰。估計今場硬仗入波唔多，墨西哥有力逼到荷蘭踢加時…

SmarTone: 亨迪拿 頂贏他

賽前預計陣容有佢名，最後卻仍然全場後備... (網上圖片)

專欄刊登於 "SmarTone足球機" App，感謝客戶邀請撰寫。

20140623 - B組：荷蘭2:0智利，賽日專欄

亨迪拿   頂贏他

文：何栢霖

荷蘭與智利，同樣兩戰全勝下，率先喺B組提早出線，今晚就上演首次名大戰。呢組出線後會遇上A組球隊，但由於該組踢尾場，巴西亦未確實首、次名(數字上甚至仍有出局可能)，呢場B組榜首之戰，兩隊都係先做好本份，容後再作部署。

荷蘭有長傳反擊、有號稱跑得快過部電車嘅洛賓同你狂奔，但今場雲佩斯停賽就冇晒入波計仔？未必。皆因橙軍有秘密武器：亨迪拿嘅鐵頭功！的確，智利上仗完美戰勝西班牙，反擊攻得銳，防守鐵桶穩；但若然回帶首仗，就算智利贏澳洲，後防應付澳洲高波確有顧忌。今場荷蘭或以史尼達斬長傳、亨迪拿出鐵頭，隨時有機會轟入智利。估計雙方合演有比數和局，荷蘭並以小組首名出線。

SmarTone: 袋鼠有戰意 橙軍難放肆

澳洲人抱住享受足球嘅態度，冇嘢好輸... (網上圖片)

專欄刊登於 "SmarTone足球機" App，感謝客戶邀請撰寫。

20140618 - B組：澳洲2:3荷蘭，賽日專欄

袋鼠有戰意   橙軍難放肆

文：何栢霖

澳洲正值以老帶新嘅換血期，旨在為半年後主辦亞洲盃磨刀。相比之下，世界盃冇嘢好輸。即使首仗不敵智利1:3，但過程中依舊踢出拼勁，卡希爾、比斯安奴呢兩位三十有四嘅老大哥，更以身作則，各自跑動10公里有多，互有到肉攻勢。卡希爾頂破智利嗰球，反映佢嘅彈跳力仍然一流。

荷蘭上場三扒兩撥，憑直接攻勢完美劏牛，雲佩斯嘅「魚躍飛頂」、洛賓嘅「柏金牌黏、挑、入」，過癮。洛賓嘅極速更不容忽視，上場佢衝刺咗64次，埋齋怒爆拉莫斯嗰球，更錄得足球員最高時速37km/h。呢個時速，拍得住上年襲港嘅強烈颱風天兔！袋鼠軍，小心打風…

明白荷蘭將會改打433進襲，但澳洲嘅拼勁，就算輸，未必會淨輸3球或以上。