何家廣播

2020世界停頓，足球廣播行業進入真空期。

3月13日錄音歐霸最精彩前，得知疫情令各地足球急急煞停。錄音完畢，已有心理準備長年職業主線，將史無前例進入無限等待真空期。

真空期內，先放假調節心態，再諗我想做啲乜。

入行邁向20年，我早已屬於廣播行業大家庭。世界停頓，手停口不停，即使留家抗疫，我仍然想做廣播。何家唔止公雞，何家可以廣播。

就係咁，我由零開始張羅拍攝硬件，全靠老友Londy、Katy仗義幫忙挑選俾意見，白板燈、腳、夾咪已備，加上自己一直喜愛玩Photoshop、Premiere剪片，呢段時間，宅喺屋企有意義。

地莊架餐，拍攝只用隨身iPhone配相機腳架，但自問以往剪剪貼貼片段尚算見得人、拜得神。因為我愛睇電視，更愛留意電視畫面字體及字幕擺位，YouTube節目一樣應該有要求。拍片，梗係橫度；字幕擺位，梗要擺喺剪片安全框內。

鬥法要博弈，亂世靠搏疫。

架餐已備，搏疫檔攤。

密切留意2020特備環節…

睇住舊片先，等緊你subscribe YouTube：

何柏霖 Ryson Ho
bit.ly/rysontube

最緊要人冇事

2015年3月，我飛英格蘭工作後stay behind，路過荷蘭阿姆斯特丹。

某個星期五下午，陰天，市內人流未算太多。運河旁除了Heineken Experience啤酒博物館，還有這幅紅磚牆上的掛畫吸引我們，隨心拍下這幅到此一遊黑白照。

2020年4月，新型肺炎襲地球，荷蘭不再荷蘭正。再沒鬱金香味道，只有冷冰冰街道。

荷蘭兩大年度盛事慘被取消：阿爾克馬爾3月尾關閉芝士市集；鹿特丹亦要取消主辦5月中第65屆歐洲歌唱大賽，更是賽事歷來第一年未能如期主辦。

一個月左右，荷蘭確診新型肺炎，就由2月27日從意大利傳入第一人，激增至4月5日17,851人，當中約一成1,766人不幸死亡。

面對疫情，荷蘭首相呂特並未採取全面封國，而是採取智能封關態度。BBC駐荷蘭記者Anna Holligan在海牙報導，封關內當地花店、鐵匠、熟食店、麵包店和玩具店仍可營業，只是要求店內人流保持距離，店員需要戴上外科手套。

有身體接觸的行業，封關內則被迫停業。髮型屋、美容屋、紅燈區妓院，這段日子連同酒吧、餐廳和大麻咖啡館都要關閉。學校、托兒所和大學則最少關閉至4月28日。

荷蘭政府建議國民留守家中，除非工種未能Home Office，或是購買必需品與呼吸新鮮空氣才外出，但需保持1.5米社交距離。

足球就是生活，生活就是朝聖。我們為阿積士的告魯夫精神到青春火花而激動，為水壩之都各運河的井井有條而驚嘆，朝聖地生病，大家絕不好受。

2020年4月，人禍疫情拖累工作行情，我們Stay Home互相增值。我在fb消失大半年後，決定開設這個全新fb，加上陸續強化YouTube，一起以文字聲畫抗悶抗疫。更重要的是，不斷寫字度稿剪片，令我在全線工作暫停期間，仍然維持工作模式，以戰養戰。

舊fb累積的老友，我邀請你們歸隊；路過傾計或新認識朋友，我期待你們入隊。以後在fb、YouTube、IG，大家搜尋「何柏霖 Ryson」都有我，等你。

2020一切歸零，最緊要人冇事。

文 / 圖：何柏霖

參考報導：BBC News

https://bbc.in/3dTQXM9

fb：rysonhk

bit.ly/rysonfb

YouTube：何柏霖 Ryson Ho

bit.ly/rysontube

IG：berlinhooo

bit.ly/rysonig

#RyNotes

#Rypacker

#阿姆斯特丹

#新型肺炎

#武漢肺炎

港超聯謝幕

全季講本地波，就以一場高質附加賽決賽作結。澳滌攻得主動，迪亞斯控制節奏得宜；南華羅港威射出美麗弧線，摩拉又兩撲12碼兼自己入埋，恭喜南華進軍2016亞協盃！

一場超過120分鐘嘅聲音導航，今晚深夜1:40, 我陪你，之後youtube都有足本重溫。

感謝一眾香港球會同球員，貢獻過癮球季。無論我哋喺咩崗位，一樣會如舊撐本地波，因為，我哋都係香港球迷。

後會有期。

寫字

明明可以全電腦，我係都要留番D位寫字。冇錯，陣容工作紙，由做料到即場mark東西，我幾堅持用手寫，同事應該都見慣我喺一張紙內，有齊紅黑藍綠筆，又螢光筆又塗改液吧？Live完之後，我會儲低工作紙嘅，寫好一點，第時睇番都睇得順眼一點吧，哈！

慶幸這些年來，總算筆未離手，muji啫哩筆由$5/枝買到$8/枝。如果第時我教小朋友，相信都會期望，佢哋先學識揸筆，再用手指掃pad…

我諗，我真係好愛寫中文字。

已經update好馬瑟韋爾新領隊巴拉哥洛夫嘅資料，今晚11:30, 蘇超馬瑟韋爾 vs 一哥鴨巴甸，亞視國際台見。

感謝老友行家關心，放心，呢場我哋波係照講足全場90分鐘嘅…

SmarTone: 古治唔係得個估字

古治係雲高爾秘密棋子?

專欄刊登於 "SmarTone足球機" App，感謝客戶邀請撰寫。

20140705 - 8強：荷蘭 Vs 哥斯達黎加，賽日專欄

古治唔係得個估字

文：何栢霖

上一圈，荷蘭受福塔雷薩嘅酷熱天氣影響下，幾乎完全受制於墨西哥腳下，加上中場鐵漢尼祖迪莊9分鐘已傷出，逼使教練雲高爾臨場一再變陣：中堅馬田斯恩迪後備入替任左閘，左閘戴利布連特就調任防守中場；到下半場早早先失，雲高爾亦當機立斷，拉後古治客串右閘，並換入新星迪派爾加強左路側擊。

古治向來實而不華，每次上陣例必同你跑到最後，有佢喺邊線同對方翼衛球員鬥力，守，則可消耗對方體力；攻，亦可放生洛賓入中路。果然，末段反撲期間，洛賓的確多番喺禁區內活動，補時最後一刻搏到絕殺12碼，更係荷蘭對付蒸籠球場嘅最佳回報。當然，洛賓有冇插水誇大動作，係好值得商榷…

嚟到8強，荷蘭連續兩圈都遇上中北美洲對手，墨西哥同哥斯達黎加都同樣起用五人防線。估計古治係今場嘅關鍵先生，加上哥軍防守高波一般，上一場不斷被希臘嘅角球轟炸造成埋門。雲佩斯或後備亨迪拿等人，今場隨時鐵頭得手。

呢場喺薩爾瓦多踢嘅5點波，天氣報告估計有雷雨。加上哥斯達黎加好韌，預計荷蘭淨勝一球，90分鐘內昂首入4強。

SmarTone: 蒸籠下的雲外看

可能係今屆世界盃，其中一張最震撼相片... (網上圖片)

專欄刊登於 "SmarTone足球機" App，感謝客戶邀請撰寫。

20140629 - 16強：荷蘭 Vs 墨西哥，賽日專欄

蒸籠下的雲外看

文：何栢霖

今晚欣賞荷蘭大戰墨西哥，大概都係抱住「雲外看，花生脆」嘅心態：第一嚿雲，當然係雲佩斯復出；但第二嚿雲就更加重要：天氣。喺B組全勝晉級嘅荷蘭，頭三場都只係喺氣候溫和嘅城市比賽，南下阿雷格里港擊敗澳洲3:2一役，當地下晝1點開波，氣溫只有攝氏14度，涼夾爽。但今日橙軍就首度北上，要喺今屆世界盃「四大蒸籠城市」之一嘅福塔雷薩比賽，同樣踢當地下晝1點場，但預計氣溫高達攝氏30度，仲要陽光猛烈，濕夾熱。加上橙軍尼祖迪莊、洛賓等三線脊骨，近日都因輕微撞傷而冇跟大隊操練，歐洲人，點算？要知道，日前強如德國，喺呢度嘅攻守速率，都俾加納比下去。

相反，墨西哥喺A組，四大蒸籠城市佢哋踢勻三個，開波氣溫亦介乎攝氏26-28度，但唔單止不敗出線，仲只失一球。0:0逼和巴西一役，都係喺福塔雷薩踢，的確對於今場甚有參考價值。嗰場主守嘅墨西哥，固然打起門將吳鎮宇… 呀，係奧曹亞先真，但三大中場硬漢亦功不可抹：古亞達度逼搶、落底出波，靴里拉同華斯基斯左右遠射開弓。雖然今場有華斯基斯停賽，但相信墨西哥已做好準備，同荷蘭打一場轟轟烈烈嘅體力消耗戰。估計今場硬仗入波唔多，墨西哥有力逼到荷蘭踢加時…

SmarTone: 澳牛的最後大Show

一記後腳，第97Cap，第59球，韋拿以擊敗澳洲，作國際賽最後道別。 (網上圖片)

專欄刊登於 "SmarTone足球機" App，感謝客戶邀請撰寫。

20140623 - B組：澳洲0:3西班牙，賽日專欄

澳牛的最後大Show

文：何栢霖

B組另一場只係「飛士戰」，澳洲、西班牙同樣兩戰全敗，提前出局。唔同嘅係，澳洲係笑住完成世界盃之旅，同荷蘭鬥攻僅敗2:3，仍然可以抬起頭做人。教練普斯迪哥路一如世界盃前所講，務求呢隊以老帶新嘅袋鼠軍娛樂球迷，等國民對新軍有所憧憬。世界盃後，一於全民期待，半年後自家搞好亞洲盃！

西班牙慘成歷屆世界盃，第5支衛冕冠軍喺分組賽下馬。兩戰全敗、一球生波不入，陣營氣氛非常奇怪。係捧盃無數嘅老將熱情不再？係沙比阿朗素唔妥入藉嘅迪亞高哥斯達？係法比加斯想反迪保斯基？一切都唔再重要。鬥牛軍大換血在即，與其怨天尤人，不如最後強陣。就當送份告別禮，多謝卡斯拿斯、沙維、阿朗素、韋拿等幾位主力，呢六年嚟對世界球壇嘅貢獻…

當兩隊放低包袱，一於演活呢場入球大SHOW吧！

SmarTone: 亨迪拿 頂贏他

賽前預計陣容有佢名，最後卻仍然全場後備... (網上圖片)

專欄刊登於 "SmarTone足球機" App，感謝客戶邀請撰寫。

20140623 - B組：荷蘭2:0智利，賽日專欄

亨迪拿   頂贏他

文：何栢霖

荷蘭與智利，同樣兩戰全勝下，率先喺B組提早出線，今晚就上演首次名大戰。呢組出線後會遇上A組球隊，但由於該組踢尾場，巴西亦未確實首、次名(數字上甚至仍有出局可能)，呢場B組榜首之戰，兩隊都係先做好本份，容後再作部署。

荷蘭有長傳反擊、有號稱跑得快過部電車嘅洛賓同你狂奔，但今場雲佩斯停賽就冇晒入波計仔？未必。皆因橙軍有秘密武器：亨迪拿嘅鐵頭功！的確，智利上仗完美戰勝西班牙，反擊攻得銳，防守鐵桶穩；但若然回帶首仗，就算智利贏澳洲，後防應付澳洲高波確有顧忌。今場荷蘭或以史尼達斬長傳、亨迪拿出鐵頭，隨時有機會轟入智利。估計雙方合演有比數和局，荷蘭並以小組首名出線。

SmarTone: 馬天尼斯 救命大師

救命靠你... (網上圖片)

專欄刊登於 "SmarTone足球機" App，感謝客戶邀請撰寫。

20140618 - B組：西班牙0:2智利，賽日專欄

馬天尼斯   救命大師

文：何栢霖

B組生死戰！若然今晚荷蘭贏、西班牙輸，衛冕嘅鬥牛軍就會目送荷蘭、智利出線，自己黯然出局。歸根究柢，始終難以理解西班牙教練迪保斯基，點解一直無視查維馬天尼斯。

西班牙上場「荷蘭痛」，迪保斯基仍然以34歲嘅沙維踢足全場。睇數據，喺中圈傳送及接應傳送呢一環，沙維全場有66次，相反拍檔沙比阿朗素，換走前只有33次。向來沙維在場，隊友就慣性靠你發辦，踢得順，固然好；但失靈下仍然「死造爛造」，一成不變也，雙輸。

都好，迪保斯基今晚終於(被逼)肯變，將派查維馬天尼斯踢正選，繼續串演中堅。佢攻守兼備，有身位，夠硬淨，相信可以從後幫輕沙維，堵塞漏動，期待。

西班牙喺地波中注入硬淨原素，遇上踢法務實嘅智利，戰況預期緊湊。估計西班牙淨勝一球，繼續喺巴西有得爭。

SmarTone: 袋鼠有戰意 橙軍難放肆

澳洲人抱住享受足球嘅態度，冇嘢好輸... (網上圖片)

專欄刊登於 "SmarTone足球機" App，感謝客戶邀請撰寫。

20140618 - B組：澳洲2:3荷蘭，賽日專欄

袋鼠有戰意   橙軍難放肆

文：何栢霖

澳洲正值以老帶新嘅換血期，旨在為半年後主辦亞洲盃磨刀。相比之下，世界盃冇嘢好輸。即使首仗不敵智利1:3，但過程中依舊踢出拼勁，卡希爾、比斯安奴呢兩位三十有四嘅老大哥，更以身作則，各自跑動10公里有多，互有到肉攻勢。卡希爾頂破智利嗰球，反映佢嘅彈跳力仍然一流。

荷蘭上場三扒兩撥，憑直接攻勢完美劏牛，雲佩斯嘅「魚躍飛頂」、洛賓嘅「柏金牌黏、挑、入」，過癮。洛賓嘅極速更不容忽視，上場佢衝刺咗64次，埋齋怒爆拉莫斯嗰球，更錄得足球員最高時速37km/h。呢個時速，拍得住上年襲港嘅強烈颱風天兔！袋鼠軍，小心打風…

明白荷蘭將會改打433進襲，但澳洲嘅拼勁，就算輸，未必會淨輸3球或以上。

SmarTone: 有維度 有靚路

好彩維度趕得切踢世界盃... (網上圖片)

專欄刊登於 "SmarTone足球機" App，感謝客戶邀請撰寫。

20140613 - B組：智利3:1澳洲，賽日專欄

有維度    有靚路

文：何栢霖

對智利嘅好感，大概可分為兩階段。第一期梗係九十年代中期，森莫蘭奴拍沙拉斯嗰代，有星味。第二期就係上屆世界盃，即使A山齊士已經係星級球員，但夾住隊友仍會踢出整體戰，攻守務實。相比起美斯近年喺球會越來越大牌，但國際賽又未證明到自己嘅球王地位，A山齊士呢位「智利C朗」就份外可敬。

智利喺死亡B組惡鬥西班牙同荷蘭前，今場當然想盡快手刃袋鼠。教練森柏奧利保證，右膝一直有傷嘅維度肯定夠Fit上陣。智利兩翼比奧斯賀亞同A山齊士，本身已經殺食，若然有埋維度復出，面對新舊未接軌嘅澳洲，有計仔淨勝兩球。

SmarTone: U-Turn 迪保斯基

迪保斯基，係要將老本搾乾搾盡？... (網上圖片)

專欄刊登於 "SmarTone足球機" App，感謝客戶邀請撰寫。

20140613 - B組：西班牙1:5荷蘭，賽日專欄

U-Turn迪保斯基

文：何栢霖

早前西班牙友賽輕取薩爾瓦多，多次靠沙比阿朗素長傳，俾前線迪亞高哥斯達衝鋒陷陣；同時亦拉後全能中場查維馬天尼斯任中堅。滿以為西班牙終於長短兼備，點知預計陣容顯示，狂牛軍今晚或會用番巴塞系舊人碧基、沙維、巴斯基斯，代替馬天尼斯、高基、阿朗素。只覺迪保斯基臨陣U-Turn，食番Tiki-Taka老本，穩陣有餘嘅，係創意欠奉囉。如果唔用長傳好手阿朗素，咁咪浪費晒哥斯達嘅大隻仔優勢？

同時，要防洛賓，西班牙必需動員封其軌跡。原以為西班牙會用右腳仔艾斯比利古達踢左閘，等佢隨時埋中路封阻小飛俠，但似乎教頭會繼續選擇佐迪艾巴…

預計今場兩強都會審慎行事，入波未必多，但雙方都有本錢攻入底線，有望角球大。

SmarTone: 扶正

高基(左)+查維馬天尼斯，會係西班牙下一代骨幹嗎？ (網上圖片)


專欄刊登於 "SmarTone足球機" App，感謝客戶邀請撰寫。
文章係世界盃賽前，為西班牙打氣而寫。
出局後睇番，更慨嘆點解迪保斯基唔好好善用旗下新秀...

20140611 - SmarTone

扶正

文：何栢霖

高處不勝寒，西班牙高峰已過？未必，但需要「踢硬D」：扶正查維馬天尼斯吧！尤其今屆勢將是沙維最後探戈，與其擔心他長期「紮住踢」，倒不如扶正「好打得」的馬天尼斯，讓沙維先任後備…

上屆世界盃，西班牙先輸首仗下仍可封王；可是今屆頭兩場即硬撼荷蘭與智利，根本沒時間給你慢熱。你還記得四年前迪莊那腳穿心腿嘛？你忍心沙維隨時一傷再傷嗎？早年馬天尼斯一記「西岸帶到東岸」的狂奔助攻，已驚為天人。西班牙願意扶正他的話，戰鬥力，UP！

足球周刊: 新鮮世界盃

感謝簡體版足球周刊邀請撰寫專欄，我嘅第一篇稿，一於將球證導師 "張Sir" 張炎有教我哋嘅，分享出嚟啦！

今屆世界盃，新鮮。

Blog呢度係我嘅創作原稿，會提到點解世界盃GLT唔好叫鷹眼，仲有張Sir親身解釋蘇超角球奇案。

為咗方便閱讀，呢篇Blog已經換番繁體字同港式譯名。

以下內容，節錄後刊於
20140603足球周刊第629期，
p.20名家周記內。








新鮮世界盃
何栢霖 > 香港足球評述員

門線技術、隱形噴劑、越位新義等，今屆世界盃，很新鮮。

對香港球迷而言，今屆世界盃是新鮮的：電視上，香港無線電視事隔16年，再度獲得世界盃獨家直播權，觀眾可免費收看其中22場直播。一個月內多場免費足球，對新一代基層市民來說，很新鮮。

對全球球迷而言，今屆世界盃是新鮮的：世界盃歷來首度引入門線技術！四年內，兩個大賽先後出現鬼魅球，終令國際足協主席白禮達向現實低頭，對門線技術一事，由早年死口反對，到讓步說可「選擇」協助，繼而再跪低變成「必需」推行。

如今，國際足協已鎖定德國的GoalControl，為今屆世界盃提供門線技術。屆時巴西全部12個世界盃球場上蓋，皆各自裝上14部高速鏡頭，以每秒500幀的速率即時拍攝3D影像，只需1秒，訊號就可傳送到裁判們的手錶，出現Goal字眼的話，就是入球。早前，國際足協亦在今屆決賽場地，里約熱內盧的馬拉簡拿球場，實地測試門線技術，視頻也有放上國際足協官網。不過有網友笑稱，片段上載日期為4月1日，希望所謂測試順利等報導，並非愚人節禮物。留意，這套科技還是再想個中文譯名好了(「操控入球」？)，不要說成「鷹眼」，皆因鷹眼是英超門線技術供應商，在這次世界盃技術競投上不敵GoalControl的…

著名意大利光頭裁判哥連拿，退役後服務於歐洲足協裁判委員會，他認為門線技術只能與底線裁判「並存」，而非「取代」。因為很多禁區內的事，都需要真人判斷，相比於只會顯示入球與否的門線技術，底線裁判的角色仍然吃重。不過，世界盃就只會使用門線技術。或許，門線技術就像我們購買保險，貴，更未必有即時回報，但總想買個安心。今屆世界盃，為了買這份安心，花費極高，最少要斥資337萬美元（約2100萬人民幣）用於門線技術上！白禮達當然知道這筆消費超高，可是為了自己不再名譽掃地，只能乖乖課金。

除了哥連拿，連香港資深國際裁判張炎有，都指英超鷹眼費用太昂貴，未必每個地區都負擔得來。他認為，只要球證以統一尺度執法，配合底線裁判輔助，判決準確度也可達9成。

現職香港足總裁判經理的張炎有，日前為香港足球評述員協會主持教學班，為我們這班「講波佬」(廣東話名稱，書面寫作足球評述員，亦即是中國的足球解說員)帶來正確的球例認知。除了底線裁判外，張Sir也提及，世界盃將會出現三件新事物：頭巾、隱形噴劑、以及全新裁判通訊設備。

以往是禁止戴頭巾比賽的。但隨著亞洲足協抗議，此舉阻礙西亞回教徒參與足運，使得國際足協不得不重新審視禁例。經過兩年測試，國際足協終於在今年3月修例，只要全隊顏色統一，男女球員都可戴頭巾比賽。

而負責噴出防守人牆線、自由球定點的隱形噴劑，經巴西及阿根廷發明家研發後，在南美球壇已採用了十多年，噴劑噴出45秒後會自動消失。經過去年世青盃及世冠盃試用，噴劑亦將首度在世界盃亮相。張Sir表示，世界盃的裁判團隊，早已習慣褙著噴劑在腰間一同操練。

至於裁判通訊設備，以往有部分國家會有錄音功能，但若然比賽聲帶外泄，對裁判工作及形象將有莫大影響。張Sir提到，有見及此，今屆賽事指引已列明，裁判通訊設備將會加密，只用作臨場通訊，不設錄音，讓裁判可安心對話，商討判罰。

球例上，大家最關心的，當然是經修訂後的越位規條。張Sir指出，字眼修訂後，條文的確較以往清晰，但同時亦為裁判帶來麻煩。好像構成「干擾對手」而導致越位的條件，就列明包括阻礙對手視線及走位元、或正在與對手爭奪皮球。他舉個例，假如攻方入球時，即使有隊友在門柱旁的越位位置，但只要該隊友動也不動，就沒有觸犯「干擾對手」，所以入球也會成立。另一個較為有趣的越位例子，就是「踩著中場線」。眾所周知，攻方在後半場接應隊友傳送是沒有越位，但若然接應時踩到中場線，就有機會越位。張Sir解釋，由於中場線是攻守雙方共用，哪怕是你鞋尖觸碰了少許中線，都算已進入前半場範圍。情況如同守方球員踩著禁區線去犯規，一樣會被罰點球。

張Sir亦解釋一個角球奇案。季初一場蘇超，恩華尼斯獲得角球後，一堆球員特地與助理球證理論，期間有隊友甲踢了已靜止的皮球一次，隔了一會，隊友乙過來，索性自己盤球入場內，輾轉由隊友射入了，但裁判認為入球無效。為甚麼呢？張Sir開估：球例第5條列明，賽事內所有重開部分，都必需先經裁判示意，明顯地，當時隊友甲踢皮球時未得裁判示意，所以隊友乙那腳，只算第一腳，當然不能自己連續觸球幾次啦！

可以說，對評述員而言，今屆世界盃都是新鮮的，至少在球例演繹上。

香港足總裁判經理張炎有(後排左四)主持教學班，向評述員講解球例。